OMM Redaksiyası
Səudiyyə Ərəbistanının beynəlxalq istirahət turizmi sənayesinin 2025-2030-cu illər arasında 93 faiz artacağı gözlənilir. Bu barədə turizm bazarındakı inkişafın müzakirə olunduğu WTM Spotlight Riyadh tədbirində məlumat verilib.
Uzun illər Səudiyyə Ərəbistanı beynəlxalq səviyyədə əsasən dini turizmlə tanınıb. Hər il Məkkəyə ibadət məqsədilə 2-3 milyon müsəlman zəvvar üz tutur. Lakin ölkənin Vision 2030 planında turizm, əyləncə və istirahət əsas istiqamətlərdən birinə çevrilib.
Tourism Economics şirkətinin EMEA üzrə idarəedici direktoru Deyv Qudcer bildirib ki, Səudiyyə Ərəbistanı sürətlə dünyanın ən dinamik turizm iqtisadiyyatlarından birinə çevrilib. Onun sözlərinə görə, ölkə 2019-cu ildən bəri qlobal səyahət artımının təxminən 15 faizini, Yaxın Şərqdəki artımın isə dörddə üçünü təmin edib.
Beynəlxalq istirahət xərclərinin ümumi turizm xərclərindəki payı 2019-cu ildəki 9 faizdən 2025-ci ildə 28 faizə yüksəlib. Bu göstəricinin 2030-cu ilədək 31 faizə çatacağı proqnozlaşdırılır. Çin də daxil olmaqla beynəlxalq bazarlarda yeni imkanların yarandığı bildirilir.
