Rusiya Xarici İşlər Nazirliyinin xüsusi tapşırıqlar üzrə səfiri Avropa İttifaqının (Aİ) mövcud təhlükəsizlik strategiyasını tənqid edib.
"Operativ Məlumat Mərkəzi-OMM" xəbər verir ki, diplomat Avropa ölkələrinin Avrasiya qitəsində real təhlükəsizlik konsepsiyasından uzaq bir yol seçdiyini bildirib.
Məlumata görə, səfir Avropa dövlətlərinin Rusiya ilə əməkdaşlıqdan imtina etdiyini və təhlükəsizlik məsələlərində yalnız bəyanatlarla kifayətləndiyini qeyd edib. Onun sözlərinə görə, Aİ-nin hazırda formalaşdırdığı sistem təhlükəsizlik arxitekturası deyil, sadəcə bu adı daşıyan bir quruluşdur.
Bildirilib ki, diplomat Avropa liderlərinin Rusiya və onun müttəfiqlərindən qaynaqlanan təhdidlər barədə açıqlamalarını tənqid edib. O vurğulayıb ki, Moskvanın irəli sürdüyü Avrasiya təhlükəsizlik konsepsiyası digər dövlətlərin təşəbbüsləri ilə ziddiyyət təşkil etmir və Rusiya bu istiqamətdə dialoqa açıqdır.
Qeyd olunub ki, Rusiyanın digər rəsmiləri də Avropadakı təhlükəsizlik siyasəti ilə bağlı narahatlıqlarını ifadə ediblər. Rusiyanın ATƏT-dəki daimi nümayəndəsi Dmitri Polyanski Avropa ölkələrinin Rusiya ilə qarşıdurmada təhlükəli həddə yaxınlaşdığını bildirib. Onun sözlərinə görə, bir sıra dövlətlər Ukraynadakı münaqişəyə daha dərindən müdaxilə etməyə çalışırlar.
Xatırladıaq ki, Rusiyanın xarici işlər naziri Sergey Lavrov daha əvvəl Avropanın münaqişənin əsas səbəblərini aradan qaldırmaq əvəzinə onu sadəcə "dondurmağa" çalışdığını bəyan edib. O, həmçinin bəzi Qərb ölkələrinin Ukraynaya hərbi kontingent göndərmək planları ilə bağlı xəbərdarlıq edib.
