Rusiya MN Ukraynanın enerji obyektlərinə zərbələr endirildiyini açıqlayıb

Rusiya Müdafiə Nazirliyi bu gecə Ukraynanın yanacaq-energetika kompleksinə aid obyektlərə kütləvi zərbələr endirildiyini bəyan edib.

"Operativ Məlumat Mərkəzi-OMM" quruma istinadən xəbər verir ki, bu hücumlar Ukrayna Silahlı Qüvvələrinin (USQ) ehtiyacları üçün istifadə olunan infrastrukturu hədəf alıb.

Hərbi idarənin yaydığı açıqlamada qeyd olunur ki, əməliyyat zamanı yüksək dəqiqlikli yer və hava bazalı silahlar, eləcə də uzaqmənzilli zərbə dronlarından istifadə edilib. Rusiya tərəfi bu addımı Kiyev rejiminin həyata keçirdiyi terror hücumlarına cavab kimi xarakterizə edib.

Məlumata görə, hücumlar nəticəsində aşağıdakı obyektlərə ciddi ziyan dəyib:

• Kiyev vilayətinin "Borispol-2" yaşayış məntəqəsində yerləşən yanacaq-sürtkü materialları anbarı;
• Poltava vilayətindəki "Zaturino" neft emalı zavodu.

Xatırladaq ki, 2022-ci il fevralın 24-dən etibarən Rusiya ilə Ukrayna arasında genişmiqyaslı hərbi münaqişə davam edir. Rusiya rəhbərliyi bu əməliyyatın məqsədini "Ukraynanın demilitarizasiyası və denasifikasiyası" kimi əsaslandırsa da, Qərb dövlətləri buna cavab olaraq Moskvaya qarşı sərt sanksiyalar tətbiq edib.