Rusiya ordusu gecə saatlarında Ukrayna ərazisinə pilotsuz uçuş aparatları (PUA) və raketlərlə genişmiqyaslı zərbələr endirib.
"Operativ Məlumat Mərkəzi-OMM" xəbər verir ki, hücumlar nəticəsində ölkənin bir neçə regionunda enerji infrastrukturu ciddi ziyan görüb.
Ukrayna hərbi rəsmilərinin verdiyi məlumata görə, hücum zamanı onlarla zərbə dronu, həmçinin ballistik və qanadlı raketlərdən istifadə olunub.
Əsas hədəflər Kiyev, Odessa və mərkəzi Ukraynadakı enerji obyektləri olub.
Kiyev vilayət administrasiyası hücumlar nəticəsində ən azı bir nəfərin öldüyünü, beş nəfərin isə yaralandığını bildirib.
Vilayətin beş rayonunda dağıntılar qeydə alınıb, ondan çox ev zərər görüb. Qubernator Mykola Kalashnyk hadisə yerində xilasetmə işlərinin davam etdiyini vurğulayıb. Odessa qubernatoru Oleh Kiper isə enerji obyektlərinə edilən dron hücumunun yanğınlara səbəb olduğunu, lakin sonradan alovun söndürüldüyünü qeyd edib.
Ukrayna xarici işlər naziri Andrey Siqiba "X" sosial şəbəkəsindəki hesabında Rusiyanın bu addımlarını kəskin tənqid edib:
"Rusiya kütləvi terror zərbələri ilə diplomatiyanı sarsıtmağa davam edir. Bu terroru normallaşdırmaq olmaz, o dayandırılmalıdır".
Nazir beynəlxalq birliyi Kremlə qarşı daha sərt sanksiyalar tətbiq etməyə çağırıb.
