OMM Redaksiyası
Rusiya Ukraynaya verdiyi dəstəyə görə Böyük Britaniyanın hərbi hədəflərinin vurula biləcəyi barədə xəbərdarlıq edib.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildirilib ki, Rusiya Xarici İşlər Nazirliyinin sözçüsü Böyük Britaniyaya Londondan müharibə ilə bağlı mövqeyinə yenidən baxmağı tələb edib.
O, hazırkı vəziyyətin münaqişəni tamamilə yeni mərhələyə keçirə biləcəyini bildirib.
Rusiya XİN-in sözçüsü Mariya Zaxarova Moskvada keçirdiyi mətbuat konfransında Böyük Britaniya və Fransanın Ukraynaya dəqiq zərbə imkanına malik raket texnologiyaları təqdim etməklə “odla oynadığını" deyib.
Böyük Britaniya Müdafiə Nazirliyindən verilən açıqlamada isə Rusiyanın Britaniya hökumətinin Ukraynada, eləcə də Böyük Britaniya və müttəfiqlərinə qarşı Rusiyanın təcavüzünə müqavimət göstərmək əzmindən şübhələnməməli olduğu bildirilib.
Böyük Britaniya bir neçə gün əvvəl Ukraynaya Rusiyanın ərazisinin dərinliklərindəki hədəfləri vurmaq imkanına malik "Storm Shadow" uzaqmənzilli qanadlı raketlərinin istehsalına başlamaq üçün Kiyevə məxfi texnologiyalara çıxış imkanı verəcəyini açıqlamışdı. Fransa da Avropada istehsal olunan raket üçün müvafiq texnologiyanın lisenziyalaşdırılmasına razılıq verib.
