Beynəlxalq axtarışda olan daha 2 təqsirləndirilən şəxs ölkəmizə ekstradisiya edilib.
Bu barədə “Operativ Məlumat Mərkəzi-OMM”-ə Baş Prokurorluğun mətbuat xidmətindən məlumat verilib.
Bildirilib ki, "Mülki, ailə və cinayət işləri üzrə hüquqi yardım və hüquqi münasibətlər haqqında" 07 oktyabr 2002-ci il tarixli Konvensiyanın tələblərinə uyğun olaraq müvafiq addımlar atılıb.
Azərbaycan Baş Prokurorluğunun vəsatəti əsasında, Azərbaycan vətəndaşları — Musayev Əbdül Ruslam oğlu və Hüseynov Rüstəm Əhməd oğlunun ekstradisiyası Rusiya Federasiyasının Baş Prokurorluğu tərəfindən təmin edilib.
Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində ibtidai istintaq edilən cinayət işi üzrə Musayev Əbdül Ruslam oğlu barəsində tədbir görülüb.
Eyni zamanda, Bakı şəhəri Pirallahı rayon prokurorluğunda aparılan ibtidai istintaq üzrə Hüseynov Rüstəm Əhməd oğlunun cinayət əməllərini törətmələrinə əsaslı şübhələr müəyyən edilib. Bu səbəbdən onlar barəsində təqsirləndirilən şəxs qismində cəlb etmə haqqında qərarlar qəbul edilərək beynəlxalq axtarış elan olunmuşdu.
Hər iki şəxs Ədliyyə Nazirliyinin Penitensiar Xidmətinin xüsusi konvoyunun müşayiəti ilə Azərbaycana gətirilib.
