OMM Redaksiyası
"Milan"ın yeni baş məşqçisi Ruben Amorim 2026-2027-ci il mövsümü üçün komandanın heyətini gücləndirmək istiqamətində ilk addımlarını atıb.
"Operativ Məlumat Mərkəzi-OMM" "Tuttosport" nəşrinə istinadən xəbər verir ki, mütəxəssis mərkəz hücumçusu mövqeyinə yeni oyunçu cəlb etməyi prioritet hesab edir.
İtaliya təmsilçisinin rəhbərliyi və baş məşqçi arasında aparılan müzakirələrdən sonra əsas namizəd qismində PSJ-nin hücumçusu Qonsalu Ramuş seçilib.
Paris klubu 24 yaşlı futbolçunu təxminən 40 milyon avro dəyərində qiymətləndirir.
Buna baxmayaraq, "Milan" rəhbərliyi fransızları oyunçunu 2027-ci ildə məcburi satınalma şərti ilə icarəyə verməyə razı salmağa çalışacaq.
Bu transfer danışıqlarında məşhur agent Jorje Mendeşin vasitəçiliyindən istifadə edilməsi planlaşdırılır. Mendeşin hər iki tərəflə yaxşı münasibətləri olduğu üçün sövdələşmənin uğurlu keçəcəyinə ümidlər böyükdür.
Qeyd edək ki, ötən mövsüm Qonsalu Ramuş 45 rəsmi matçda 12 qol vurub və 2 məhsuldar ötürmə ilə yadda qalıb.
Əgər PSJ ilə razılıq əldə olunmasa, "Milan"ın ehtiyat planı da hazırdır. Klubun rəhbərliyi alternativ variant kimi hazırda "Əl-Hilal"da çıxış edən Darvin Nunyesin namizədliyini də nəzərdən keçirir.
