OMM Redaksiyası
İngiltərəli futbolçu Rahim Sterlinq Niderlandın "Feyenoord" klubunu tərk etməyə hazırlaşır.
"Operativ Məlumat Mərkəzi-OMM" "Algemeen Dagblad" nəşrinə istinadən xəbər verir ki, 31 yaşlı hücumçu cari mövsüm başa çatdıqdan sonra Rotterdam təmsilçisindən azad agent kimi ayrılacaq.
Fevral ayında onun kluba transferi böyük uğur kimi qiymətləndirilsə də, futbolçu yaşıl meydanda gözləntiləri doğrulda bilməyib.
İngiltərə Premyer Liqasında dörd dəfə çempionluq sevinci yaşayan və milli komandanın heyətində 82 oyun keçirən hücumçunun "Feyenoord"a çempionatda ikinci yer uğrunda mübarizədə kömək edəcəyi gözlənilirdi.
Lakin o, Niderland təmsilçisinin heyətində cəmi 6 matçda meydana çıxıb və yalnız 1 məhsuldar ötürmə ilə yadda qalıb.
Baş məşqçi Robin van Persi əvvəlcə yeni müqavilənin müzakirə oluna biləcəyini bildirsə də, klub rəhbərliyi artıq Rahim Sterlinqlə əməkdaşlığı davam etdirməmək barədə qəti qərar qəbul edib.
