OMM Redaksiyası
Yaxın Şərqdə regional gərginliyin artması ilə əlaqədar Qazaxıstan hökuməti indiyədək 7300-dən çox vətəndaşını münaqişə zonasından çıxarıb.
"Operativ Məlumat Mərkəzi-OMM" xəbər verir ki, Qazaxıstan Xarici İşlər Nazirliyi digər dövlət qurumları ilə koordinasiyalı şəkildə təxliyə prosesini davam etdirir.
Vətəndaşların geri qaytarılması həm yerli, həm də xarici aviaşirkətlərin dəstəyi ilə həyata keçirilir. Hava nəqliyyatı ilə yanaşı, quru yollarından da aktiv istifadə olunur.
Məlumata görə, Qazaxıstan vətəndaşları bölgəni Azərbaycan, Ermənistan və Türkmənistan sərhəd keçid məntəqələri vasitəsilə tərk edirlər. Ölkənin regiondakı diplomatik nümayəndəlikləri logistik məsələlərdə vətəndaşlara daimi dəstək göstərir.
Qazaxıstan rəsmiləri vətəndaşlara Yaxın Şərqin bir neçə ölkəsinə səfər etməkdən çəkinməyi tövsiyə edib.
Həmçinin bildirilib ki, fevralın 28-dən sonra riskli bölgələrə səyahət edən turistlər milli turizm zəmanət sistemindən kənarda qalacaqlar. Bu addım qeyri-müəyyən təhlükəsizlik vəziyyətində riskləri minimuma endirmək məqsədi daşıyır.
Prezident Kasım-Jomart Tokayev gərginliyin azaldılması istiqamətində atılan addımları, xüsusilə İranın qonşu dövlətlərə hücum etməmək qərarını müsbət qiymətləndirib.
Digər tərəfdən, Qazaxıstan Milli Bankının sədri Timur Süleymenov qlobal neft bazarlarındakı dalğalanmaların ölkə iqtisadiyyatına təsirlərini diqqətdə saxladıqlarını bildirib. Qazaxıstanın ixrac gəlirlərinin yarısından çoxunun neftdən asılı olduğunu vurğulayan Süleymenov, yüksək neft qiymətlərinin büdcə daxilolmalarını artırsa da, münaqişənin davamlılığının iqtisadi risklər yaratdığını qeyd edib.
