OMM Redaksiyası
“Sabah”ın müdafiəçisi Timoteuş Puxaç dini inancının həyatında mühüm yer tutduğunu bildirib. 27 yaşlı polşalı futbolçu bu barədə Maya Strelçikin “Autochwile” podkastında danışıb.
Puxaçın sözlərinə görə, o, həmişə inanclı olub, lakin son dövrlərdə həyatında mənəvi dəyişikliklər baş verib. Futbolçu həyat yoldaşı Oliviya ilə tanışlığının bu prosesə təsir etdiyini vurğulayıb.
“Oliviya ilə tanış olanda əsl sevgini tapdığımı hiss etdim. Mənim üçün Allah sevgidir. Həyat yoldaşımla Allaha olan sevgim arasında güclü bağlılıq var. Bu yaxınlarda dedim ki, İsa Məsih kimi olmaq istərdim. Sadəcə, hamıya yaxşılıq etmək istəyirəm”, – Puxaç deyib.
Polşa millisinin üzvü matçlara özü ilə İncil apardığını və meydana çıxmazdan əvvəl kitabdan parçalar oxuduğunu da söyləyib. Onun həyat yoldaşı Oliviya isə podkastda Puxaçın tənqidlərdən motivasiya aldığını bildirib.
Ötən mövsümdən “Sabah”da çıxış edən müdafiəçi Bakı klubu ilə Azərbaycan çempionu olub və ölkə kubokunu qazanıb. Komanda daha sonra Çempionlar Liqasının liqa mərhələsinə yüksəlib. Puxaç bu uğuru dini inancı ilə əlaqələndirib və Allahın ona arzuları səbəbsiz vermədiyinə inandığını deyib.
“Sabah” bu gün Çempionlar Liqasının liqa mərhələsində ikinci oyununu keçirəcək. Bakı təmsilçisi “Slaviya”nı (Praqa) Bakı Olimpiya Stadionunda qəbul edəcək. Görüş saat 20:45-də başlayacaq.
