Polşa Almaniya ilə imzalanacaq yeni müdafiə əməkdaşlığı sazişinə NATO öhdəliklərini aşan qarşılıqlı təhlükəsizlik zəmanətlərinin daxil edilməsinə razılıq verməyib.
"Operativ Məlumat Mərkəzi-OMM" xəbər verir ki, bununla bağlı PAP xəbər agentliyi Berlindəki mənbələrə və Polşa Müdafiə Nazirliyinə istinadən məlumat yayıb.
Məlumata görə, Almaniya tərəfi sazişə Polşanın əvvəllər Fransa və Böyük Britaniya ilə əldə etdiyi razılaşmalara bənzər genişləndirilmiş təhlükəsizlik zəmanətlərinin daxil edilməsini təklif edib. Lakin Varşava bu təşəbbüsü qəbul etməyib.
Qeyd olunub ki, son anda sənədin hökumətlərarası müqavilə deyil, müdafiə nazirləri səviyyəsində imzalanması qərara alınıb.
Polşanın xarici işlər naziri Radoslav Sikorski daha əvvəl bildirmişdi ki, hökumətlərarası saziş ölkə prezidenti Karol Navrotski tərəfindən təsdiqlənməyə bilər. Navrotski Almaniyaya qarşı sərt mövqeyi ilə tanınır.
Bu səbəbdən imzalanacaq sənədin 2011-ci ildə tərəflər arasında bağlanmış analoji sazişin yenilənmiş versiyası olacağı, lakin ciddi dəyişikliklər ehtiva etməyəcəyi qeyd olunur.
Polşa Müdafiə Nazirliyi də təsdiqləyib ki, sənəddə NATO və Avropa İttifaqı müqavilələrindən irəli gələn öhdəliklərdən əlavə təhlükəsizlik təminatları yer almayacaq.
Qeyd olunub ki, son illərdə Polşa Avropadakı əsas müttəfiqləri ilə müdafiə və təhlükəsizlik sahəsində əməkdaşlığı genişləndirir. 2025-ci ilin mayında Varşava və Fransa xarici hücum halında qarşılıqlı müdafiəni nəzərdə tutan yeni dostluq müqaviləsi imzalayıb. Bir il sonra oxşar saziş Birləşmiş Krallıq ilə də bağlanıb.
