Afət Ziyadqızı
İran İslam Respublikasının Prezidenti Məsud Pezeşkian İrəvanda keçirilən BMT-nin Bioloji Müxtəliflik haqqında Konvensiyasının Tərəflər Konfransının 17-ci sessiyasının (COP17) Liderlər Sammitində çıxış edib. M.Pezeşkian çıxışında ABŞ və İsrailin Yaxın Şərq regionunda həyata keçirdiyi hərbi əməliyyatların və gərginliyin ətraf mühitə, enerji infrastrukturlarına və qlobal ekosistemə vurduğu ağır zərərlərdən danışıb.
"Operativ Məlumat Mərkəzi-OMM" xəbər verir ki, İran Prezidenti hərbi münaqişələrin enerji obyektlərinin dağıdılmasına, iri miqyaslı yanğınlara və təhlükəli çirkləndirici maddələrin atmosferə yayılmasına səbəb olduğunu, bununla da biologiya və təbiət üçün ciddi təhdid yaratdığını diqqətə çatdırıb.
Pezeşkian vurğulayıb ki, silahlı toqquşmalar meşə sahələrinin və bataqlıqların məhvinə, su ehtiyatlarının kəskin azalmasına və həssas ekoloji mühitlərin pozulmasına gətirib çıxarır. Həmçinin vəhşi təbiət nümayəndələrinin öz təbii yaşayış arealını tərk etməsi, kimyəvi maddələrin və ağır metalların torpaq və su hövzələrinə sızması kimi təhlükəli proseslər kütləviləşir.
İran dövlət başçısının sözlərinə görə, bu cür dağıdıcı zərərlərin fəsadları aktiv hərbi əməliyyatlar başa çatdıqdan sonra da uzun onilliklər boyu aradan qaldırıla bilmir: “Ətraf mühitin məhv edilməsi birbaşa müharibənin acı nəticəsidir və gələcək nəsillərin mövcudluğu üçün ciddi risk törədir”, – deyə o əlavə edib.
Mümkün ekoloji fəlakətlərin lokal xarakter daşımadığını xatırladan M.Pezeşkian beynəlxalq birliyi təcili tədbirlər görməyə çağırıb:
“Bu, təkcə bir ölkənin daxili sərhədləri ilə məhdudlaşan problem deyil: təbiət siyasi sərhədləri tanımır. Su, torpaq və havanın çirklənməsi qısa müddətdə dövlət sərhədlərini aşaraq bütün regionu əhatə edir. Bu səbəbdən silahlı münaqişələrin vurduğu ekoloji zərərlər beynəlxalq səviyyədə diqqətlə qiymətləndirilməli və razılaşdırılmış qərarlar qəbul olunmalıdır”.
Pezeşkian İranın təbii mühitinə vurulan ziyan da daxil olmaqla, hərbi təcavüzün ekoloji fəsadlarına qarşı beynəlxalq ictimaiyyətin adekvat və kəsərli addımlar atmasının zəruriliyini vurğulayıb.
