Afət Ziyadqızı
Ermənistanın Baş naziri Nikol Paşinyanın Rusiya Federasiyasına planlaşdırılan rəsmi səfərinin dəqiq tarixi hələlik müəyyənləşdirilməyib. Bu barədə Rusiya Prezidentinin mətbuat katibi Dmitri Peskov “RİA Novosti” agentliyinə verdiyi açıqlamada bildirib.
"Operativ Məlumat Mərkəzi-OMM" xəbər verir ki, Kremlin rəsmi nümayəndəsi səfərlə bağlı diplomatik kanallar vasitəsilə razılaşdırma işlərinin davam etdiyini qeyd edərək, "Hələlik dəqiq tarixlər yoxdur", – deyə vurğulayıb.
Xatırladaq ki, Rusiya Prezidenti Vladimir Putin Bişkekdə keçirilən Şanxay Əməkdaşlıq Təşkilatının (ŞƏT) sammiti çərçivəsində Paşinyanla ikitərəfli danışıqlar aparmışdı. Görüşün yekununda Putin ikitərəfli əməkdaşlığın konseptual və praktiki məsələlərini ətraflı müzakirə etmək üçün Ermənistanın Hökumət rəhbərini Moskvaya dəvət etdiyini bəyan etmişdi.
Qeyd edək ki, oktyabrın 7-də Paşinyan rusiyalı həmkarına telefonla zəng edərək onu ad günü münasibətilə təbrik edib və tərəflər İrəvan-Moskva münasibətlərinin cari gündəliyini nəzərdən keçiriblər.
