Afət Ziyadqızı
Ermənistanın Baş naziri Nikol Paşinyan Türkmənistanda keçiriləcək Müstəqil Dövlətlər Birliyinin (MDB) sammiti çərçivəsində Rusiya Federasiyasının Prezidenti Vladimir Putin və Azərbaycan Respublikasının Prezidenti İlham Əliyev ilə qeyri-rəsmi təmasların olacağını istisna etməyib.
"Operativ Məlumat Mərkəzi-OMM" xəbər verir ki, keçirdiyi brifinqdə jurnalistlərin suallarını cavablandıran Paşinyan oktyabrın 7-də Rusiya Prezidentinə telefonla zəng edərək təbrik etdiyini xatırladıb.
O, liderlərin eyni beynəlxalq platformada bir araya gəldiyini vurğulayıb: “Bu gün və sabah eyni tədbirdə olacağıq. Belə beynəlxalq formatlarda təmaslar şübhəsiz ki, baş tutur. İkitərəfli rəsmi görüşlər planlaşdırılmasa da, sammit gedişində zərurət yarandığı təqdirdə ayaqüstü müzakirələr və dialoq mümkündür”.
MDB Dövlət Başçıları Şurasının növbəti iclası Türkmənistanın “Avaza” milli turizm zonasında təşkil olunur. Proqrama əsasən, oktyabrın 8-də nümayəndə heyətlərinin rəhbərləri MDB ölkələrinin milli kulinariya festivalına qatılacaq, axşam saatlarında isə Türkmənistan Prezidentinin adından rəsmi ziyafət veriləcək.
Sammitin əsas işgüzar paneli oktyabrın 9-da öz işinə başlayacaq. Qeyd edək ki, təşkilatın tarixində ilk dəfə olaraq geniş tərkibli iclasa qonaq qismində İran İslam Respublikasının Prezidenti Məsud Pezeşkian da dəvət olunub.
