Afət Ziyadqızı
Azərbaycan Respublikasının İnsan Hüquqları üzrə Müvəkkili (Ombudsman) vəzifəsinə 3 namizədin adı irəli sürülüb: hazırkı ombudsman Səbinə Əliyeva, hüquq elmləri doktoru Ceyhun Qaracayev və Ali Məhkəmənin hakimi Elşanə Vəliyeva.
“Operativ Məlumat Mərkəzi-OMM” namizədlərin dosyesini təqdim edir:
1. Səbinə Yaşar qızı Əliyeva
- Vəzifəsi və fəaliyyəti: Hüquq üzrə fəlsəfə doktoru, 2019-cu ildən Azərbaycan Respublikasının İnsan hüquqları üzrə müvəkkilidir (Ombudsman). Eyni zamanda Asiya Ombudsman Assosiasiyasının vitse-prezidenti və İslam Əməkdaşlıq Təşkilatının Ombudsmanlar Assosiasiyasının İdarə Heyətinin üzvüdür.
- Ailəsi: Keçmiş Azərbaycan SSR sənaye tikintisi naziri Qurban Sultanovun nəvəsidir. Milli Məclisin deputatı Siyavuş Novruzovun həyat yoldaşıdır, iki övladı var.
- Təltifləri: Prezident tərəfindən "Dövlət qulluğunda fərqlənməyə görə" (2013), "Hərbi əməkdaşlıq sahəsində xidmətlərə görə" (2020) və "Heydər Əliyevin 100 illiyi (1923–2023)" yubiley medalları ilə təltif olunub.
2. Ceyhun Məmməd oğlu Qaracayev
- Vəzifəsi və fəaliyyəti: 1965-ci il təvəllüdlü hüquq elmləri doktoru, professordur. Əmək fəaliyyətinə 1982-ci ildə Bakı Şəhər Məhkəməsində iclas katibi kimi başlayıb. Bakı Dövlət Universitetini bitirdikdən sonra Odessa Dövlət Hüquq Akademiyasında müəllim və dosent işləyib.
- Karyerası: Milli Məclis Aparatında şöbə müdirinin müavini, 2010–2020-ci illərdə Konstitusiya Məhkəməsinin hakimi və 2015–2019-cu illərdə İşgəncələrin qarşısının alınması üzrə Beynəlxalq Komitənin (CPT) üzvü olub.
- Təltifləri: 3-cü dərəcəli "Vətənə xidmətə görə" ordeni, "Tərəqqi" medalı, "AXC-nin 100 illiyi" və "Heydər Əliyevin 100 illiyi" yubiley medalları ilə təltif edilib.
3. Elşanə Vəli qızı Vəliyeva
- Vəzifəsi və fəaliyyəti: 1975-ci il təvəllüdlü Elşanə Vəliyeva Bakı Dövlət Universitetinin Hüquq fakültəsini bitirib. 2017-ci ildən Azərbaycan Respublikası Ali Məhkəməsinin hakimi, 2023-cü ildən isə Hakimlərin Seçki Komitəsinin üzvüdür.
- Karyerası: Əmək fəaliyyətinə 1992-ci ildə Ali Arbitraj Məhkəməsində mütəxəssis kimi başlayıb, İqtisad Məhkəməsində baş mütəxəssis və iclas katibi olub. 2007–2010-cu illərdə Nərimanov Rayon Məhkəməsinin, 2010–2017-ci illərdə isə Bakı Apellyasiya Məhkəməsinin hakimi kimi çalışıb.
- Təltifləri: Prezident İlham Əliyevin 11 fevral 2023-cü il tarixli sərəncamı ilə "Tərəqqi" medalı ilə təltif olunub.
