NATO xarici işlər nazirlərinin növbəti strateji görüşünə 21-22 may tarixlərində İsveçin Helsinqborq şəhəri ev sahibliyi edəcək.
“Operativ Məlumat Mərkəzi-OMM”-in Alyansın rəsmi bəyanatına istinadən verdiyi məlumata görə, NATO-nun baş katibi Mark Rütte İsveçin bu tədbirə ev sahibliyi etmək qərarını alqışlayıb.
Helsinqborqda keçiriləcək görüşün əsas müzakirə mövzuları aşağıdakılardır:
- Müdafiə xərclərinin artırılması;
- Müdafiə sahəsində istehsalın genişləndirilməsi;
- Ukraynaya daha çox dəstəyin göstərilməsi.
Bəyanatda vurğulanır ki, nazirlərin Helsinqborq görüşü bu ilin iyulunda Ankarada keçiriləcək NATO dövlət və hökumət başçılarının növbəti sammitinə zəmin yaratmağa kömək edəcək.
Xatırladaq ki, İsveç 2024-cü ilin martında rəsmi olaraq NATO-nun 32-ci üzvü statusunu əldə edib.
