Afət Ziyadqızı
Moskva rəsmi Vaşinqtonun Ukrayna böhranı ilə bağlı tutduğu son mövqeyi və Ağ Ev rəhbərliyinin Kiyevə yönəlmiş sərt ritorikasını diqqətlə izləyir. "Bloomberg" agentliyinin Kremlə yaxın mənbələrə istinadən yaydığı məlumata görə, Rusiya siyasi kuluarlarında ABŞ Prezidenti Donald Trampın Ukrayna Prezidenti Volodimir Zelenskiyə qarşı səsləndirdiyi kəskin tənqidlər təəccüblə qarşılanıb.
"Operativ Məlumat Mərkəzi-OMM" xəbər verir ki, agentliyin materialında Rusiya rəsmi dairələrinin Trampın Zelenskiyə münasibətdə sərgilədiyi ritorikanın kəskinliyindən heyrətləndiyi bildirilir.
Mənbələrdən birinin qiymətləndirməsinə görə, Birləşmiş Ştatlar Kiyevə kəşfiyyat məlumatlarının ötürülməsini məhdudlaşdırmasa və hərbi-texniki yardımların həcmini azaltmasa, bu tür sərt siyasi bəyanatların real müstəvidə nəticə verməsi ehtimalı aşağıdır.
Məlumatda həmçinin qeyd olunur ki, Moskva rəsmiləri ABŞ Prezidentinin yaxın perspektivdə Ukrayna münaqişəsinin nizamlanması ilə bağlı Rusiyanın milli maraqlarına uyğun gələn razılaşmaya nail olacağına hələ də təmkinlə və məhdud ümidlə yanaşırlar.
Xatırladaq ki, oktyabrın 9-da Rusiya Prezidenti Vladimir Putin ilə ABŞ Prezidenti Donald Tramp arasında telefon danışığı baş tutub. Ağ Ev rəhbəri danışıqların yekunlarına dair bəyanatında Putinlə energetika bazarında sabitliyin təmin olunması istiqamətində vacib razılaşma əldə edildiyini bildirib. Sazişə əsasən, Rusiyanın oktyabr ayında dünya və ABŞ bazarlarına 300 min ton, noyabrda 500 min ton, növbəti mərhələdə isə 1 milyon ton dizel yanacağı tədarük etməsi nəzərdə tutulur.
