Rusiya Xarici İşlər Nazirliyinin rəsmi nümayəndəsi Mariya Zaxarova Böyük Britaniya və Fransanı Rusiya ərazisində törədilən terror aktlarında birbaşa iştirakda ittiham edib.
“Operativ Məlumat Mərkəzi – OMM” xəbər verir ki, Zaxarova keçirdiyi brifinqdə Qərb paytaxtlarının məsuliyyətdən yayınmağa çalışdığını, lakin onların rolunun danılmaz olduğunu bildirib.
Diplomatın sözlərinə görə, London və Parisin Ukraynaya hərbi texnologiyaların ötürülməsi ilə bağlı qərarları Rusiyanın dərinliklərindəki hədəflərə zərbələr endirilməsinə imkan yaradır.
“Siz Parisdə, Londonda, Berlində və digər paytaxtlarda terror aktlarında iştiraka görə birbaşa məsuliyyət daşıyırsınız”, - deyə Zaxarova bildirib.
Zaxarovanın açıqlamasında gərginliyi artıran amillərdən biri kimi Böyük Britaniyanın Ukraynaya hərbi texnologiya ötürməsi məsələsi də qeyd olunub.
Məlumata görə, Britaniya tərəfi Ukraynaya SCALP uzaqmənzilli raketlərinin komponentlərinin istehsalı üçün zəruri texniki məlumatları təqdim edib.
Bu prosesin Ukrayna və Fransa arasında ölkə ərazisində yerli istehsal xətlərinin yaradılması planları çərçivəsində həyata keçiriləcəyi bildirilir.
