“Milan” qışda “Real”ın hücumçusu Endrik üçün yenidən cəhd edəcək

Braziliyalı hücumçu Endrik mövsümün əvvəlində “Real”da demək olar ki, oyun vaxtı almamasından narazıdır. Braziliya millisinin baş məşqçisi Karlo Ançelotti də bir neçə gün əvvəl futbolçunun müntəzəm oynamamasının problem olduğunu bildirib.

"Operativ Məlumat Mərkəzi-OMM" “Corriere dello Sport” nəşrinə istinadən xəbər verir ki, “Milan” qış transfer pəncərəsində Endriki heyətinə qatmaqda maraqlıdır.

“Rossoneri” yayda da braziliyalı futbolçunu transfer etməyə çalışıb, lakin klubun təklifi qısa müddətdə rədd edilib.

Mənbənin yazdığına əsasən, A Seriyasının nəhənglərindən biri yanvarda Endrik üçün yenidən cəhd göstərəcək.

“Real”ın mövqeyi

Madrid klubu 20 yaşlı hücumçunu satmaq niyyətində deyil. Bununla belə, ötən il olduğu kimi, Endrikin icarəyə göndərilməsi variantı nəzərdən keçirilə bilər.

Endriklə maraqlanan digər klublar arasında “Roma”nın da olduğu qeyd edilir.