Məsud Pezeşkian sərt xəttçiləri mitinqlərdən kənarlaşdırdı

İranda ABŞ ilə davam edən danışıqlar fonunda hökumətyönlü mitinqlərdə bəzi sərt xətt tərəfdarlarının iştirakına məhdudiyyət qoyulduğu bildirilir.

“Operativ Məlumat Mərkəzi-OMM” xəbər verir ki, bu barədə “Iran International” məlumat yayıb.

Məlumata görə, ultra-mühafizəkar mövqeyi ilə tanınan Paydari Cəbhəsinin tərəfdarları bu həftənin əvvəlində keçirilən dövlət dəstəkli gecə mitinqlərindən uzaqlaşdırılıblar.

Bildirilir ki, bu qərar prezident Məsud Pezeşkian və parlament sədri Məhəmməd Bağır Qalibafın müraciətlərindən sonra qəbul edilib. Məqsədin ABŞ ilə danışıqların davam etdiyi bir vaxtda daxili siyasi gərginliyin və sərt xətt təzyiqlərinin qarşısını almaq olduğu qeyd olunur.

“Iran International”ın məlumatına əsasən, nüvə proqramı ilə bağlı mümkün güzəştlərə qarşı şüarlar yazılmış plakatlar daşıyan etirazçılar da hökumətyönlü tədbirlərdən uzaqlaşdırılıb.

Müşahidəçilər hesab edirlər ki, bu addım İran rəhbərliyinin xarici siyasətlə bağlı həssas danışıqlar dövründə daxili siyasi mesajlara daha ciddi nəzarət etməyə çalışdığını göstərir.