Venesuela prezidenti Nikolas Maduro 28 iyul prezident seçkilərinin mübahisəli nəticələri ilə bağlı Ali Məhkəmədə ifadə verib.
"Operativ Məlumat Mərkəzi-OMM" xarici KİV-ə istinadən xəbər verir ki, o, bu barədə aparılan istintaqla tam şəkildə əməkdaşlıq etdiyini bildirib.
Məhkəmə, eyni zamana, Maduronun rəqibi Edmundo Qonzalesi ifadə verməyə çağırıb.
Lakin o, Ali Məhkəmənin Maduro hökumətinə tabe olduğunu, müstəqil fəaliyyət göstərmədiyini əsas gətirərək iclasa getməkdən imtina edib.
Milli Seçki Şurası seçkidə Maduronun 50 faizdən çox səs toplayaraq qalib gəldiyini elan edib. Qonzales isə prosesdə 80 faizdən çox səs toplayaraq qalib gəldiklərini, buna dair əllərində sübut olduğunu iddia edir.
Qeyd edək ki, prezident seçkilərindən sonra keçirilən etiraz aksiyaları zamanı yaranmış qarşıdurmalarda bir neçə nəfər ölüb. Küçə və meydanlarda zorakılıq törədən 2 mindən çox şəxs həbs edilib.
