OMM Redaksiyası
Macarıstanın Baş naziri Viktor Orban bazar günü təcili müdafiə şurasının iclasını çağırıb.
"Operativ Məlumat Mərkəzi-OMM" xəbər verir ki, buna səbəb Serbiyada Rusiya qazını Macarıstana daşıyan boru kəmərinin yaxınlığında güclü partlayıcı maddələrin aşkar edilməsidir.
Serbiya Prezidenti Aleksandar Vuçiç "Instagram" hesabında Macarıstan sərhədinə yaxın Kanjiza şəhəri ərazisində dağıdıcı gücə malik partlayıcının tapıldığını bildirib.
Hadisənin Macarıstanda keçiriləcək milli seçkilərdən bir neçə gün əvvəl baş verməsi siyasi gərginliyi artırıb.
"Reuters" agentliyinə danışan keçmiş kəşfiyyat rəsmiləri bunun seçkilərə təsir məqsədi daşıyan "saxta bayraq" əməliyyatı ola biləcəyini istisna etməyiblər. Müxalifət lideri Peter Magyar da hadisəyə şübhə ilə yanaşdığını qeyd edib.
Müdafiə şurasının iclasından sonra Orban bildirib ki, partlayıcılar Balkanlar vasitəsilə Mərkəzi və Şərqi Avropaya Rusiya qazını nəql edən kəmərə qarşı təxribat cəhdinin bir hissəsidir.
O, "TurkStream" kəmərinin Rusiya hissəsinin də davamlı hərbi hücumlara məruz qaldığını vurğulayıb.
Serbiya hərbi kəşfiyyatının rəhbəri partlayıcıların ABŞ istehsalı olduğunu iddia edib.
Ukrayna Xarici İşlər Nazirliyinin sözçüsü "X" platformasında ittihamları rədd edərək, bunun Rusiyanın seçkilərə müdaxilə cəhdi ola biləcəyini bildirib.
Hazırda həm Macarıstan, həm də Serbiya boru kəməri ətrafında təhlükəsizlik tədbirlərini gücləndirib.
