Avropa İttifaqı Şurasının rəhbəri Viktor Orbanı hədələdi

Avropa İttifaqı (Aİ) Şurasının sədri Antoniu Koşta Macarıstanın Baş naziri Viktor Orbana qarşı sərt bəyanatla çıxış edərək, Ukraynaya ayrılan maliyyə yardımının qarşısının alınmasının ciddi nəticələri olacağını bildirib.

“Operativ Məlumat Mərkəzi-OMM” xəbər verir ki, bu barədə məlumatı mənbələrə istinadən "Politico" nəşri yayıb.

Məlumata görə, Koşta Macarıstan tərəfinə xəbərdarlıq edib ki, 18 dekabr tarixli qərara əməl olunmaması Aİ ölkələri arasında "vicdanlı əməkdaşlıq prinsipi"nin pozulması deməkdir.

O vurğulayıb ki, heç bir üzv dövlət Avropa İttifaqı Şurası tərəfindən kollegial şəkildə qəbul edilmiş qərarların nüfuzuna xələl gətirə bilməz.

Siyasətçilər arasındakı bu yazışmaların rəsmi Brüssel ilə Budapeşt arasındakı mövcud münaqişəni daha da dərinləşdirdiyi qeyd olunur.

Xatırladaq ki, fevralın 20-də Macarıstan Ukraynaya 90 milyard avro məbləğində kreditin verilməsini bloklayıb. Macarıstanın xarici işlər naziri Peter Siyarto bəyan edib ki, Kiyev Rusiya neftinin "Drujba" boru kəməri vasitəsilə tranzitini bərpa etməyənə qədər Budapeşt bu qərara veto qoymağa davam edəcək.

Qeyd edək ki, 2025-ci ilin dekabrında keçirilən sammitdə Aİ liderləri Ukraynaya faizsiz kredit ayrılması barədə razılığa gəlmişdilər. Lakin üç ölkə — Macarıstan, Çexiya və Slovakiya bu maliyyələşmədə iştirakdan hüquqi müstəvidə imtina edib.