Afət Ziyadqızı
Böyük Britaniya hökuməti İsrailin İordan çayının qərb sahilində yerləşən mübahisəli “E1” ərazisində tikinti üçün tender elan etməsinə sərt etiraz edib.
“Operativ Məlumat Mərkəzi – OMM” xəbər verir ki, rəsmi London İsrailin müvəqqəti işlər vəkilini Xarici İşlər Nazirliyinə çağıraraq tender qərarının geri götürülməsini tələb edib.
Böyük Britaniyanın xarici işlər naziri Ed Miliband İsrailin addımını “qəbuledilməz və dağıdıcı” adlandırıb. O bildirib ki, “E1” ərazisində tikinti işlərinin aparılması gələcək Fələstin dövlətinin yaradılmasına və iki dövlətli həll perspektivinə ciddi təhlükə yaradır.
Miliband İsrailin xarici işlər naziri Gideon Saarla məsələni müzakirə etdiyini və İsrail hökumətini bütün məskunlaşma planlarını dayandırmağa çağırdığını açıqlayıb.
Qüdsün şərqində, şəhərlə “Maale Adumim” yaşayış məntəqəsi arasında yerləşən “E1” ərazisi strateji mövqeyə malikdir.
İsrail bu həftə ərazidə yeddi yaşayış kompleksində 1 234 mənzilin tikintisi üçün tender elan edib.
Layihənin tənqidçiləri hesab edirlər ki, tikinti həyata keçirilərsə, İordan çayının qərb sahilinin şimal və cənub hissələri arasında ərazi əlaqəsi zəifləyəcək, həmçinin Şərqi Qüdsün ətrafındakı Fələstin yaşayış məntəqələrindən təcrid olunması riski artacaq.
Qeyd edək ki, Böyük Britaniya beynəlxalq hüquqa əsasən İordan çayının qərb sahilindəki İsrail məskunlaşmalarını qeyri-qanuni hesab edir. Rəsmi London iyul ayında da biznes qurumlarına “E1” və digər yaşayış məntəqələrindəki tikinti layihələrində iştirak etməmələri barədə xəbərdarlıq etmişdi.
