Afət Ziyadqızı
ABŞ və İran arasında davam edən gərginlik fonunda Körfəz bölgəsində təhlükəsizlik vəziyyəti daha da kəskinləşib. Küveytə yönələn raket və dron hücumlarının artması ölkəni münaqişənin həssas nöqtələrindən birinə çevirib.
“Operativ Məlumat Mərkəzi-OMM” xəbər verir ki, Küveyt hərbçilərinin İran tərəfindən həyata keçirilən hücumların qarşısını aldığı bildirilir.
Küveytin əsas hədəflərdən birinə çevrilməsinin səbəblərindən biri ölkədə ABŞ üçün strateji əhəmiyyət daşıyan hərbi obyektlərin yerləşməsidir. “Camp Arifjan” və “Ali Al Salem” aviabazasında ABŞ hərbçilərinin xidmət etdiyi bildirilir. Küveyt həmçinin Vaşinqtonun NATO üzvü olmayan əsas müttəfiqlərindən biridir.
Analitiklərin fikrincə, İran ABŞ-nin Körfəzdəki tərəfdaşlarına təzyiq göstərməklə Vaşinqtonun hərbi fəaliyyətinin siyasi və iqtisadi yükünü artırmağa çalışır.
Küveytin İranla coğrafi yaxınlığı da təhlükəni artıran əsas amillərdəndir. Ölkənin neft ixrac marşrutları, xüsusilə Hörmüz boğazı vasitəsilə həyata keçirilən enerji daşımaları regiondakı eskalasiyadan ciddi şəkildə təsirlənə bilər.
Küveyt hava hücumundan müdafiə imkanlarını gücləndirmək üçün “Patriot” və “NASAMS” sistemlərindən istifadə edir. Lakin mütəxəssislər bildirirlər ki, kütləvi raket və dron hücumları qarşısında hətta müasir hava hücumundan müdafiə sistemləri də ciddi sınaqla üzləşə bilər.
Beləliklə, İran-ABŞ qarşıdurmasının genişlənməsi Küveyt üçün həm təhlükəsizlik risklərini, həm də müdafiə xərclərini əhəmiyyətli dərəcədə artırır.
