OMM Redaksiyası
Gürcüstanın baş naziri İrakli Kobaxidze Bakı-Tbilisi-Qars dəmir yolu xəttinin tam istifadəyə verilməsinin ölkənin beynəlxalq tranzit rolu baxımından mühüm hadisə olduğunu bildirib.
APA-nın yerli bürosunun məlumatına görə, Kobaxidze hökumətin iclasında çıxışı zamanı xəttin bir neçə ay əvvəl tam istifadəyə verilməsinin Gürcüstanın regional tranzit qovşağı kimi mövqeyini möhkəmləndirdiyini deyib.
Baş nazir ölkənin dəmir yolu şəbəkəsinin müasirləşdirilməsinin davam etdiyini bildirib. Onun sözlərinə görə, artıq 200 vaqon alınıb, daha 200 vaqonun çatdırılması gözlənilir. Yaxın aylarda parka təxminən 50 yeni lokomotivin əlavə olunması da planlaşdırılır.
Azərbaycan və Gürcüstan may ayında Bakı-Tbilisi-Bakı marşrutu üzrə gündəlik sərnişin daşımalarının mayın 26-dan bərpa edilməsi barədə razılığa gəlib. Bu əlaqə COVID-19 pandemiyasından bəri dayandırılmışdı.
