OMM Redaksiyası
Almaniya millisinin sabiq futbolçusu Kerem Demirbay milli komandanı seçdiyinə görə peşman olduğunu bildirib. O, Türkiyə millisində oynamaq istədiyini, bu istiqamətdə federasiya ilə bir il yarım çalışdıqlarını deyib.
Demirbayın sözlərinə görə, danışa bilmədiyi müəyyən səbəblərə görə Almaniya millisinin xeyrinə qərar verib. Qol sevincindən sonra formasını çıxardığını və belindəki Türkiyə döyməsinin göründüyünü deyən futbolçu bundan sonra Almaniya yığmasına bir daha çağırılmadığını bildirib. Döymə Türkiyənin sərhədlərinin konturudur və sağ kürək sümüyünün üzərində yerləşir.
“İndi çağırsalar belə, Almaniya üçün bir daha oynamazdım. Mən türkəm və Türkiyə millisinin şanlı formasını geyinə bilmədiyimə görə ömür boyu peşman olacağam”, – deyə Demirbay bildirib. Onun sözlərini “Daily Mail” yayıb.
Demirbayın karyerası
33 yaşlı futbolçu Almaniyada doğulub. Hər iki valideyni türk olduğuna görə Türkiyə millisində oynamaq hüququna malik olub və Türkiyənin yeniyetmə yığmalarında çıxış edib. Ancaq böyüklər səviyyəsində doğulduğu ölkəni təmsil etməyi seçib.
Demirbay Almaniya millisində 2017-ci ilin iyununda, “Hoffenhaym”da çıxış etdiyi vaxt iki oyun keçirib və bir qol vurub.
