OMM Redaksiyası
Fransanın daxili işlər naziri Loran Nunes ölkədəki gərginliyə baxmayaraq, bu həftə keçiriləcək Çempionlar Liqası matçlarının ləğv olunmayacağını bildirib. RMC Sport-un məlumatına görə, buna PSJ ilə “Barselona” arasında Parisdə keçiriləcək görüş də daxildir.
Oyunların ləğvi gündəmdə deyil
Nunes baş nazir Sebastyan Lekornyu ilə birlikdə Matinyon sarayında keçirilən mətbuat konfransında çərşənbə axşamı, oktyabrın 20-də baş tutacaq PSJ – “Barselona” matçının ləğv edilməsinin müzakirə olunmadığını deyib. Onun sözlərinə görə, Avropa turnirlərində keçiriləcək digər oyunlar, o cümlədən Lildəki qarşılaşma da ləğv edilməyəcək. “Görüşlər ləğv olunmur”, – nazir vurğulayıb.
Çempionlar Liqasının ümumi mərhələsinin üçüncü turu çərçivəsində keçiriləcək PSJ – “Barselona” oyunu Bakı vaxtı ilə saat 23:00-da başlayacaq.
Etirazlar və saxlanılanlar
Fransanın Paris və digər şəhərlərində yanacağın bahalaşmasına və əhalinin alıcılıq qabiliyyətinin azalmasına qarşı etiraz aksiyaları keçirilir. Təşkilatçıların məlumatına görə, aksiyalarda təxminən 800 min nəfər iştirak edib. Daxili İşlər Nazirliyinin açıqladığı rəqəm isə 550 min nəfərdir.
Bəzi yaşayış məntəqələrində dinc aksiyalar polislə toqquşmalara və iğtişaşlara çevrilib. Nunes 2 mindən çox şəxsin saxlanıldığını bildirib və hakimiyyətin talanlarda və qarətlərdə iştirak edənlərin təqibini davam etdirəcəyini deyib.
