OMM Redaksiyası
Rusiyanın Federal Təhlükəsizlik Xidməti (FSB) Polşa kəşfiyyatı üçün işləməkdə və ölkənin qərbində yerləşən Kalininqrad vilayətində hərbi obyektlər barədə məlumat toplamaqda şübhəli bilinən iki nəfəri saxlayıb.
AnewZ-in məlumatına görə, FSB-yə istinadən “İnterfaks” bu barədə noyabrın 11-də xəbər verib. Rusiya kəşfiyyatı, həmçinin Polşa xüsusi xidmət orqanları ilə əlaqələrdə şübhəli bilinən yeddi Polşa və üç Rusiya vətəndaşına xəbərdarlıq edildiyini bildirib.
Polşa Rusiyanın açıqlamalarını rədd edib, lakin ittihamları konkret şəkildə şərh etməyib. Xüsusi xidmətlərə cavabdeh nazirin sözçüsü Yatsek Dobşinski Rusiya kəşfiyyatının yaydığı iddialarla bağlı açıqlama verməyəcəyini bildirib.
“Milli Müstəqillik Günü münasibətilə bunları, xüsusən də növbəti təxribat və dezinformasiya aktı hesab edirəm”, – deyə Dobşinski “X” sosial şəbəkəsində yazıb. O, həmçinin düşmən narrativinin təkrarlanmamasına və Rusiya təbliğatına qoşulmamağa çağırıb.
Polşa Milli Müstəqillik Gününü noyabrın 11-də qeyd edir.
Polşanın Daxili Təhlükəsizlik Agentliyi (ABW) daha əvvəl, noyabrın 5-də altı nəfərin saxlanıldığını açıqlamışdı. Saxlanılanlar arasında Polşanın beş vətəndaşı və 37 yaşlı Rusiya vətəndaşı olan qadın var.
Onlar Rusiyaya məhdudiyyət qoyulmuş hərbi hissələri, o cümlədən mərmi gilizləri və mərmiləri qanunsuz daşımaqla Rusiya kəşfiyyatı üçün işləməkdə şübhəli bilinirlər. Dörd nəfərə ittiham irəli sürülüb və onlar hazırda üç aylıq istintaq təcridxanasındadır.
Kalininqrad strateji əhəmiyyət daşıyır
Kalininqrad Baltik dənizi sahilində, Polşa və Litva arasında yerləşən Rusiyanın eksklavıdır. Strateji mövqeyi bu bölgəni Moskva, Avropa İttifaqı və NATO arasındakı münasibətlərdə həssas məsələyə çevirib.
Son ittihamlar Rusiya ilə Qərb ölkələri arasında bölgədə təhlükəsizlik və kəşfiyyat fəaliyyəti ilə bağlı davam edən gərginlik fonunda irəli sürülüb.
