İsrailin Müdafiə naziri Yoav Qalant Qəzza zolağının sakinlərinə çağırış edib.
"Operativ Məlumat Mərkəzi-OMM" xarici KİV-ə istinadən xəbər verir ki, Qalant, danışıqlardan sonra ordunun əməliyyatlarını bərpa edəcəyini və hücumların daha da şiddətlənəcəyini bildirib.
Onun sözlərinə görə, humanitar fasilənin elan edilməsində əsas məqsədlərdən biri də, fələstinlilərin döyüşlərin getdiyi bölgələri təhlükəsiz şəkildə tərk etmələrinə şərait yaratmaq olub.
“Hücumlarımız davam edəcək və bu bütün Qəzza zolağında reallaşacaq. İşimiz bitənə qədər, hədəflərimizə tam çatana qədər əməliyyatlarımız dayanmayacaq. Bütün fələstinliləri, yaranmış fürsətdən yararlanmağa və Qəzzanı tərk etməyə çağırıram” – deyə Qalant bildirib.
Qeyd edək ki, münaqişələr ərzində Qəzzada təxminən 1,7 milyon fələstinli İsrailin hücumları nəticəsində evlərindən didərgin düşüb. Onların əksəriyyəti Qəzzanın cənubuna köçüb.
