İsrailin Qəzzada davam edən hərbi əməliyyatları fonunda İordan çayının qərb sahilində də təhlükəsizlik vəziyyəti kəskinləşib.
“Operativ Məlumat Mərkəzi-OMM” xəbər verir ki, iyul ayının sonlarında Nablus yaxınlığındakı Tal kəndində silahlı məskunlaşanların daxil olması ilə başlayan qarşıdurmalarda dörd fələstinli və iki İsrail əsgəri həlak olub.
Hadisədən sonra İsrail qüvvələrinin kəndi mühasirəyə aldığı, onlarla sakinin saxlanıldığı və bəzi yerli sakinlərin evlərini, eləcə də əkin sahələrini tərk etməyə məcbur edildiyi bildirilib.
BMT-nin məlumatına görə, 2026-cı ilin ilk yarısında qeyri-qanuni məskunlaşanların hücumları və evlərin dağıdılması nəticəsində 3 min 200-dən çox fələstinli yaşayış yerlərini tərk etmək məcburiyyətində qalıb. “Reuters” agentliyinin məlumatına əsasən, bu proseslər həm hərbi, həm də siyasi qərarlarla müşayiət olunur.
İsrail parlamenti "Knesset"də İordan çayının qərb sahilində məskunlaşma siyasətinin genişləndirilməsi ilə bağlı bir sıra qərarlar qəbul edilib. Məlumata görə, bölgədə İsrail qanunlarının tətbiqi və ərazilərin idarə olunması ilə bağlı müxtəlif təşəbbüslər irəli sürülüb.
Bölgədəki gərginliyin əsas yükünü isə mülki əhali, xüsusilə uşaqlar daşıyır. Son aylarda fələstinli uşaqların ölümü, tibbi yardıma çıxışda yaranan maneələr və yaşayış ərazilərinə hücumlarla bağlı xəbərlər beynəlxalq narahatlığa səbəb olub.
Həmçinin bildirilib ki, fələstinlilərin əkin sahələrinə və zeytun bağlarına qarşı hücumlar artıb. Amnesty International-ın hesabatlarında isə İordan çayının qərb sahilində evlərin dağıdılması və məskunlaşma siyasəti ilə bağlı məlumatlar yer alıb.
