İspaniyanın Şimali Afrikadakı Seuta anklavında kütləvi miqrasiya axını nəticəsində azı 34 nəfər həyatını itirib.
“Operativ Məlumat Mərkəzi-OMM” xəbər verir ki, son 24 saat ərzində təxminən 49 min miqrant quru və dəniz yolu ilə Seutaya daxil olub. Rəsmilər su hövzələrindən çoxsaylı meyitin çıxarıldığını təsdiqləyiblər.
Məlumata görə, təxminən 85 min əhalisi olan şəhərə bir gün ərzində əhalisinin yarısından çoxu qədər miqrant daxil olub. İspaniya hakimiyyəti gələnlər arasında 7 minə yaxın uşağın olduğunu açıqlayıb. Sosial şəbəkələrdə yayılan görüntülərdə minlərlə insanın sərhəd hasarlarını aşmağa çalışdığı, bəzilərinin isə dəniz yolu ilə əraziyə keçdiyi əks olunub. Mərakeş təhlükəsizlik qüvvələrinin sərhəd yaxınlığında toplaşan kütləni dağıtmaq üçün su şırnaqlarından istifadə etdiyi bildirilib.
İspaniya hökuməti vəziyyətə nəzarəti bərpa etmək məqsədilə Seuta və Melillaya əlavə polis və hərbi qüvvələr göndərib. Daxili İşlər Nazirliyi qanunsuz yollarla ölkəyə daxil olan miqrantların hüquqi prosedurlara uyğun şəkildə mümkün qədər tez geri qaytarılacağını açıqlayıb.
Qeyd edək ki, İspaniyanın Baş naziri Pedro Sançes vəziyyəti yerində qiymətləndirmək üçün Seutaya səfər edib. Hadisə Avropa İttifaqında miqrasiya siyasəti ilə bağlı müzakirələri yenidən gündəmə gətirib. İtaliyanın Baş naziri Giorgia Meloni sərhəd təhlükəsizliyi ilə bağlı fövqəladə tədbirlərin görülməsini təklif edib. İspaniyanın xarici işlər naziri Xose Manuel Albares isə bu mövqeni tənqid edərək, səsləndirilən fikirləri qəbuledilməz adlandırıb.
