İranlı nümayəndələr Dohadakı danışıqları tərk edib, ABŞ üçün layihə yayılır

İranlı danışıqçılar ABŞ-la müharibəyə son qoymaq məqsədilə Qətər vasitəçiləri ilə apardıqları danışıqları tərk ediblər. Danışıqlardan məlumatlı rəsminin bazar ertəsi verdiyi məlumata görə, razılaşma layihəsi tərəflər arasında yayılır və növbəti görüş keçirilə bilər.

Rəsminin sözlərinə görə, İran nümayəndələri danışıqlarda çətinlik yarandığı üçün deyil, bazar günü — noyabrın 1-də Dohadan ayrılıblar. O, layihənin məzmunu barədə əlavə məlumat verməyib.

İran Xarici İşlər Nazirliyinin sözçüsü Esmail Baqayi bildirib ki, müzakirələr Tehranın sentyabrda hazırladığı yeddi mərhələli plana əsaslanır. Plan Hörmüz boğazının yenidən açılmasını və ABŞ-ın İrana qarşı tətbiq etdiyi dəniz blokadasına son qoyulmasını nəzərdə tutur. Tehran mümkün razılaşma çərçivəsində planın daha sürətli icrasını təklif edib.

Baqayi deyib ki, xarici işlər nazirinin müavini Kazem Qəribabadi Qətər vasitəçiləri ilə Vaşinqton arasında mesaj mübadiləsinə yardım etmək üçün Dohaya səfər edib.

“Tələblərimizi çox aydın və şəffaf şəkildə ifadə etmişik. Bu tələblər məntiqli və əsaslıdır: ABŞ-ın dəniz blokadasına son qoyulmadan, İranın tələblərinə hörmət edilmədən və qanuni ehtiyacları qarşılanmadan yekun razılaşmaya başlamaq, Hörmüz boğazını açmaq və ya təhlükəsizliyini təmin etmək mümkün deyil”, — Baqayi bildirib.

“Əl-Cəzirə” telekanalı şənbə günü İranın xarici işlər naziri Abbas Əraqçiyə istinadən yazıb ki, razılaşma əldə olunarsa, Hörmüz boğazı əvvəl təklif edilən yeddi gün əvəzinə iki gün ərzində açıla bilər.

İranın ilkin təklifini ABŞ Prezidenti Donald Tramp rədd edib.

Diplomatik səylər ABŞ-da çərşənbə axşamı keçiriləcək aralıq seçkilərindən sonra münaqişənin yenidən kəskinləşə biləcəyi ilə bağlı narahatlıqlar fonunda davam edir. Tehranın seçkilərlə bağlı mövqeyi barədə suala cavab verən Baqayi İranın seçkilərin “yeni ABŞ doğuracağını” gözləmədiyini deyib.

Tramp səsverməyədək Vaşinqtonun İrana qarşı yeni hücumlara başlamayacağını bildirib və Tehranla danışıqları məhsuldar adlandırıb. Bununla belə, o, gələcəkdə hərbi əməliyyatların davam etdirilməsi ehtimalını istisna etməyib.