Alimlər başda İran olmaqla Suriya və İraqda 5 ildir təsirli olan misli görünməmiş quraqlığa iqlim dəyişikliyinin səbəb olduğunu müəyyən ediblər.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Beynəlxalq alimlərdən ibarət World Weather Attribution (WWA) qrupunun yeni təhlilinə görə, insan fəaliyyəti nəticəsində yaranan iqlim dəyişikliyi Suriya, İraq və İranda quraqlığa səbəb olan hava şəraitini daha tez-tez və daha şiddətli hala gətirib.
Alimlər bildiriblər ki, ekstremal quraqlıq əsasən iqlim dəyişikliyindən qaynaqlanır və bu olmasaydı, bölgədə normal şərait müşahidə olunardı.
Bu, İran üçün qeydə alınmış ən ağır quraqlıq kimi qiymətləndirilir. Ümumilikdə bölgə üçün də ən şiddətli vəziyyətlərdən biri sayılır.
Beş ildir davam edən quraqlıqdan ən çox zərər görən İranın su böhranı sağlamlıq üçün təhlükə yaradır və gəliri məhsul yığımına bağlı olan fermerləri ciddi şəkildə təsirləndirir. Su böhranı davam edərsə, 10 milyon əhalisi olan Tehranın təxliyə olunması riski mövcuddur.
İqlim dəyişikliyi olmadan bu cür ekstremal hava hadisələrinin yüz ildə ancaq bir neçə dəfə baş verməsi gözlənilirdi, lakin iqlim dəyişikliyi ilə bu hadisələr geniş yayılmış hala gəlib.
