İran müdafiə nazirliyi: Raket və PUA imkanları müzakirə mövzusu ola bilməz

İranın müdafiə sənayesi rəsmiləri ölkənin raket və pilotsuz uçuş aparatı (PUA) proqramının müzakirə mövzusu olmadığını bəyan ediblər.

“Operativ Məlumat Mərkəzi-OMM” xəbər verir ki, bu barədə briqada generalı Məcid İbn ər-Rza “X” sosial şəbəkəsindəki paylaşımında məlumat verib.

Bildirilib ki, parlament üzvləri ilə keçirilən görüş zamanı ABŞ və İsrailin İrana qarşı son hərbi addımları və onların nəticələri müzakirə olunub.

Qeyd olunub ki, Məcid İbn ər-Rza İranın müdafiə, raket və PUA imkanlarının ölkənin milli təhlükəsizliyinin ayrılmaz hissəsi olduğunu vurğulayıb. Onun sözlərinə görə, bu sahədəki potensial nə hazırda, nə də gələcəkdə hər hansı müzakirənin predmeti ola bilməz.

Məlumata görə, general ölkənin müdafiə imkanlarının daha da gücləndirilməsinin zəruri olduğunu bildirib.

Bildirilib ki, İranın raket və PUA sahəsində inkişafı xarici amillərdən asılı olmayaraq, daxili resurslar və yerli texnoloji imkanlar hesabına davam etdiriləcək.