Afət Ziyadqızı
İranın Natanz nüvə kompleksinin yaxınlığında, qranit dağ massivinin altında inşa edilən obyekt ətrafında tikinti fəallığı müşahidə olunur. Obyektin İranın nüvə proqramını mümkün hücumlardan qorumaq məqsədilə sığınacaq kimi layihələndirildiyi ehtimal edilir.
“Operativ Məlumat Mərkəzi-OMM” xəbər verir ki, Strateji və Beynəlxalq Araşdırmalar Mərkəzinin (CSIS) ekspertlərinin məlumatına görə, 2026-cı ildən etibarən ərazidə aktiv qazıntı işlərindən daxili tikinti mərhələsinə keçilib. Tunel girişlərinin möhkəmləndirilməsi və yol şəbəkəsinin örtülməsi istiqamətində də işlərin aparıldığı bildirilir.
Hazırda obyektin uranın zənginləşdirilməsi fəaliyyətinə hazır olmadığı təxmin edilir. İsrail kəşfiyyatı isə İranın sentrifuqaları bu əraziyə köçürməyə cəhd göstərə biləcəyini irəli sürüb.
ABŞ Prezidenti Donald Tramp obyektin istənilən vaxt hədəfə alına biləcəyini söyləyib. O, bölgədəki bütün hərəkətliliyin yaxından izlənildiyini və obyektin yaxın zamanda vurula biləcəyini qeyd edib.
Qranit strukturun Pentaqonun arsenalında olan ən ağır qeyri-nüvə bombalarına, o cümlədən GBU-57 MOP-a qarşı belə yüksək müdafiə təmin etdiyi bildirilir.
ABŞ ordusunun bu cür dərin yeraltı obyektləri məhv etmək məqsədilə raket sınaq poliqonlarında araşdırmalar apardığı və yeni nəsil bunkerdağıdan bomba hazırlamaq üzrə işlərini davam etdirdiyi qeyd olunur.
