İranın xarici işlər naziri Abbas Araqçı Tehranın Vaşinqtonla nüvə danışıqlarını ciddiyətlə və ayıq-sayıq şəkildə bərpa etdiyini bildirib.
"Operativ Məlumat Mərkəzi-OMM"-in xəbərinə görə, nazir vurğulayıb ki, bu prosesdə real irəliləyiş əldə olunması ABŞ-nin nümayiş etdirəcəyi səmimi yanaşmadan asılıdır.
Məsələ ilə bağlı İranın yüksək rütbəli rəsmiləri İsrailin prosesə müdaxilə cəhdləri barədə xəbərdarlıq ediblər.
İran ordusunun baş komandanı general-mayor Mousavi isə ölkənin hərbi hazırlığının ən yüksək səviyyədə olduğunu bəyan edib. O bildirib ki, düşmən tərəf hər hansı bir strateji səhvə yol verərsə, Tehran tərəfindən indiyədək təcrübə etmədikləri dərəcədə sərt cavab alacaqlar.
Qeyd edək ki, İran və ABŞ arasındakı dolayı danışıqlar keçən həftə cümə günü Omanın vasitəçiliyi ilə Maskatda bərpa olunub. Rəsmi Tehran bu prosesdə keçmiş təcrübələri nəzərə alaraq qarşı tərəfə tam etibar etmədiklərini və silahlı qüvvələrin dəstəyi ilə bu yolu davam etdirəcəklərini vurğulayıb. Əli Laricani həmçinin "X" sosial şəbəkəsindəki paylaşımında amerikalı siyasətçiləri Netanyahunun manipulyasiyalarına qarşı ayıq olmağa səsləyib.
