OMM Redaksiyası
Yəməndəki husilər Səudiyyə Ərəbistanının paytaxtı Ər-Riyaddakı “həssas” obyektlərə raket və pilotsuz uçuş aparatları ilə hücum etdiklərini açıqlayıb.
Səudiyyə Ərəbistanı isə şənbə günü paytaxta doğru atılan raketin hava hücumundan müdafiə sistemləri tərəfindən zərərsizləşdirildiyini bildirib. “Reuters”in yaydığı görüntülərdə Ər-Riyad hava limanı yaxınlığında alov və böyük qara tüstü buludu görünüb. Hadisənin dəqiq mənbəyi açıqlanmayıb.
Husilər həmçinin Yanbu şəhərindəki “Aramco” obyektinə hücum etdiklərini iddia edib. Yanbu Səudiyyə Ərəbistanının əsas neft ixrac mərkəzlərindən biridir. Səudiyyə rəsmiləri Biş, Fərəsən, Taif və Yanbu şəhərlərinə yönələn hücumların da qarşısının alındığını bildiriblər.
BMT-nin baş katibi Antonio Quterreş və Körfəz Əməkdaşlıq Şurasının rəhbəri Jasem Məhəmməd Əl-Budeyvi Səudiyyə Ərəbistanına hücumları pisləyib. Onlar mülki obyektlərin hədəfə alınmasının regional sülh və təhlükəsizlik üçün ciddi təhdid yaratdığını vurğulayıblar.
İran parlamentinin sədri Məhəmməd Baqir Qalibaf bildirib ki, Tehran şərtləri yerinə yetirilməyənədək Hörmüz boğazını açmayacaq. O qeyd edib ki, ABŞ-ın öhdəlikləri də həyata keçirilməlidir.
İranın təhlükəsizlik məsələləri üzrə rəsmisi Möhsün Rzayi isə ABŞ-ı danışıqlara başlamaq üçün Tehranın “hüquq və şərtlərini” qəbul etməyə çağırıb. Onun sözlərinə görə, İran Vaşinqtona danışıqların başlanması üçün yeddi şərt təqdim edib.
ABŞ Prezidenti Donald Tramp Yaxın Şərqdə gərginlik fonunda Kemp-Deviddəki həftəsonu səfərini yarımçıq dayandırıb. Ağ Ev məlumatına əsasən, onun şənbə günü gec saatlarda geri qayıtması gözlənilirdi. Səfərin niyə qısaldıldığı açıqlanmayıb.
ABŞ Dövlət Departamenti regionda gərginliyin artması barədə xəbərdarlıq edib və amerikalıları Yaxın Şərqə səfərlərə yenidən baxmağa çağırıb.
