Hindistanın cənubunda Andhra Pradeş və Telanqana ştatlarında yağan aramsız yağışlar daşqınlara, maddi ziyana və insan tələfatına səbəb olmaqda davam edir.
"Operativ Məlumat Mərkəzi-OMM" xəbər verir ki, bu barədə “India Today” məlumat yayıb.
Rəsmilər iki əyalətdə güclü yağışlar nəticəsində həyatını itirənlərin sayının 19-a yüksəldiyini, ölənlərin 9-nun Andhra Pradeş, 10-nun isə Telanqana əyalətindən olduğunu bildirib.
Səlahiyyətlilər qeyd edib ki, Andhra Pradeş ştatında sel suları altında qalan 3 nəfərin və Telanqanada itkin düşdüyü bildirilən 1 nəfərin axtarışları davam edir.
Andhra Pradeşdə yağışlardan zərər çəkmiş 17 mindən çox insanın təhlükəsiz bölgələrə təxliyə edildiyini bildirən səlahiyyətlilər, ştat daxilində 140 qatar səfərinin ləğv edildiyini və təxminən 6 min sərnişinin stansiyalarda qapalı vəziyyətdə qaldığını bildirib.
