Afət Ziyadqızı
Türkiyə Xarici İşlər Nazirliyi İsrail qüvvələrinin Qəzza zolağına yönələn “Qlobal Sumud Donanması – İkinci Missiya” adlı humanitar donanmanın gəmilərinə qarşı hərəkətlərini piratçılıq aktı kimi qiymətləndirib.
"Operativ Məlumat Mərkəzi-OMM" xəbər verir ki, bu barədə nazirliyin yaydığı diplomatik bəyanatda bildirilib.
Bəyanatda qeyd olunub: “Qəzzaya humanitar yardım çatdırmaq məqsədilə yaradılan Qlobal Sumud Donanmasına beynəlxalq sularda İsrailin hücumu piratçılıq aktıdır. İsrail Qəzzada humanitar fəlakətə diqqət çəkməyə çalışan donanmaya hücum etməklə humanitar dəyərləri və beynəlxalq hüququ pozub. Bu təcavüz eyni zamanda beynəlxalq sularda naviqasiya azadlığı prinsipinin də pozulmasıdır”.
Məlumata görə, Türkiyə Xarici İşlər Nazirliyi beynəlxalq ictimaiyyəti İsrailin bu addımına qarşı vahid mövqe sərgiləməyə çağırıb. Qurum həmçinin bildirib ki, digər ölkələrlə birlikdə Türkiyə vətəndaşları və donanmadakı digər sərnişinlərlə bağlı vəziyyətin həlli üçün bütün zəruri addımlar atılır.
Nazirliyin sözçüsü Öncü Keçeli isə açıqlamasında qeyd edib ki, Türkiyənin xarici işlər naziri Hakan Fidan ispan həmkarı Xose Manuel Albarezlə telefon danışığı apararaq donanma ətrafındakı vəziyyəti müzakirə edib. Bildirilib ki, söhbət zamanı İsrail qüvvələrinin Krit sahilləri yaxınlığında açıq dənizdə donanmaya müdaxiləsinin müxtəlif ölkələrdən olan mülki şəxslərin həyatını təhlükəyə atdığı və beynəlxalq hüququ pozduğu vurğulanıb.
Qeyd olunub ki, beynəlxalq ictimaiyyət bu cür qanunsuz müdaxilələrə qarşı ortaq mövqe nümayiş etdirməlidir.
