OMM Redaksiyası
Gürcüstan Dövlət Təhlükəsizliyi Xidməti uran-238-i xarici vətəndaşa 700 min dollara satmağı planlaşdıran şəxsin saxlanıldığını bildirib.
Şübhəli Cinayət Məcəlləsinin radioaktiv maddələrin qanunsuz alınması, saxlanması və dövriyyəsinə dair 230-cu maddəsi ilə 10 ilədək azadlıqdan məhrum edilə bilər.
Xidmətin yaydığı görüntülərdə silahlı əməkdaşların kişini ağ rəngli avtomobildən çıxarıb yerdə qandalladığı görünür. Kadrlarda agentlərin avtomobilin baqajındakı iki kiçik qabı əl radiometrindən istifadə etməklə yoxlaması da əks olunub. Qablardan birində açıq rəngli toz olduğu ehtimal edilir.
Dövlət Təhlükəsizliyi Xidməti işi transmilli cinayət kimi xarakterizə edib və materialın bombanın hazırlanmasında istifadə oluna biləcəyini bildirib. Uranın mənşəyi və nəzərdə tutulan təyinat yeri açıqlanmayıb.
Uran-238 uranın ən geniş yayılmış izotopudur. Radioaktiv olsa da, adətən təkbaşına nüvə bombası hazırlamaq üçün istifadə edilə bilməz.
Şübhəli və ya onun vəkilindən şərh almaq mümkün olmayıb.
İş fevralda baş vermiş oxşar hadisədən sonra araşdırılır. Həmin vaxt Gürcüstanda iki nəfər 3 milyon dollar dəyərində uran almağa cəhd göstərməkdə, eləcə də nüvə silahlarının sınaq proqramları ilə əlaqəli radioaktiv izotopu saxlamaqda şübhəli bilinərək saxlanılmışdı.
