Afət Ziyadqızı
İranın “Flydubai” aviaşirkətinə məxsus təyyarə ilə bağlı yaşanan insidentə görə İsrail xüsusi xidmət orqanlarını günahlandırması diqqəti əsas məsələdən yayındırmaq cəhdidir. Bu fikri Rusiya Ali İqtisadiyyat Məktəbinin baş müəllimi, şərqşünas Andrey Zeltyn bildirib.
"Operativ Məlumat Mərkəzi-OMM" xəbər verir ki, rusiyalı ekspert İranın bu cür ittihamlarla çıxış etməsinin təəccüblü olmadığını və Tehranın məsuliyyətdən yayınmaq üçün tez-tez oxşar üsullara əl atdığını diqqətə çatdırıb.
Onun sözlərinə görə, İsrail xüsusi xidmət orqanlarının qarşıdurmanı yenidən alovlandırmaq üçün mülki təyyarənin pilot kabinəsində süni şəkildə insident yaratmasına heç bir ehtiyacı yox idi.
Xatırladaq ki, hadisə sentyabrın 30-da səhər saatlarında Təl-Əvivə uçan təyyarədə baş verib. Uçuş zamanı kəskin hündürlük itirən hava gəmisi əvvəlcə 7700 fövqəladə vəziyyət, daha sonra isə təyyarənin ələ keçirilməsi şübhəsini bildirən 7500 kodu ilə təhlükə siqnalı göndərib.
