Peşəkar Futbol Liqasının (PFL) prezidenti Elxan Səmədov Xankəndi şəhər stadionunda “Xankəndi” və “Karvan-Yevlax” komandaları arasında keçirilən oyunu izləyib. O, stadionun yenidən qurulmasından sonra burada çempionat matçının təşkilini Azərbaycan futbolu üçün əlamətdar hadisə adlandırıb.
Səmədov bildirib ki, stadionun müasir standartlara uyğunlaşdırılması və yaradılan şərait təqdirəlayiqdir. Onun sözlərinə görə, Xankəndidə futbolun canlanması və azarkeşlərin doğma komandalarını öz şəhərlərində dəstəkləməsi xüsusi əhəmiyyət daşıyır. PFL rəhbəri arenanın gələcəkdə də maraqlı qarşılaşmalara ev sahibliyi edəcəyinə ümid etdiyini, bu işə töhfə verənlərə təşəkkürünü çatdırıb.
O, stadionun İlham Əliyevin iştirakı ilə yenidən istifadəyə verilməsindən bir neçə gün sonra çempionat oyununa ev sahibliyi etməsini mühüm hadisə kimi qiymətləndirib. Səmədov Gənclər və İdman Nazirliyinin əməyini, azarkeşlərin marağını və stadiondakı futbol ab-havasını da qeyd edib. Onun fikrincə, belə oyunlar bölgədə futbol ənənələrinin bərpasına və gənclərin idmana marağının artmasına töhfə verə bilər.
PFL prezidentinin sözlərinə görə, “Xankəndi”nin mövsümün qalan ev oyunlarını şəhər stadionunda keçirməsi nəzərdə tutulur. Komandanın gələcəkdə burada daimi məskunlaşması klubun planlarından, infrastruktur imkanlarından və aidiyyəti qurumlarla müzakirələrdən asılı olacaq.
Səmədov qeyd edib ki, UEFA-nın III kateqoriyasına aid stadionda Premyer Liqa və beynəlxalq oyunlar keçirmək mümkündür. Bu, Xankəndi sakinlərinə gələcəkdə belə qarşılaşmaları izləmək imkanı verə bilər.