Çilinin Santyaqo şəhərinə bağlı Renca rayonu ərazisindən keçən "General Velasquez" magistral yolunda dəhşətli yol-nəqliyyat hadisəsi baş verib.
"Operativ Məlumat Mərkəzi-OMM" xarici KİV-ə istinadən xəbər verir ki, maye qaz daşıyan tankerin idarəetmədən çıxaraq aşması və digər nəqliyyat vasitələrinə çırpılması nəticəsində güclü partlayış qeydə alınıb.
Partlayış nəticəsində 4 nəfər hadisə yerində dünyasını dəyişib. Ümumilikdə 17 nəfər xəsarət alıb.
Partlayışın təsiri ilə magistral yoldakı 7 avtomobil alovlanaraq tamamilə yanıb.
Hadisə yerinə dərhal çox sayda yanğınsöndürən və xilasetmə briqadaları cəlb olunub.
Təhlükəsizlik tədbirləri çərçivəsində magistral yol hər iki istiqamətdə nəqliyyatın hərəkəti üçün bağlanıb. Faktla bağlı yerli hüquq-mühafizə orqanları tərəfindən genişmiqyaslı araşdırma başladılıb.
