Cənubi Koreyada 2025-ci ildə qeydə alınan doğum səviyyəsi 2010-cu ildən bəri illik əsasda ən sürətli artımı göstərib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, ötən il 254 min 500 körpə dünyaya gəlib və bu göstərici 2024-cü illə müqayisədə 16 min 100 nəfərlik artım deməkdir.
Yeni doğulanların sayında 6,8 faizlik yüksəliş 2010-cu ildən bəri qeydə alınan ən sürətli illik artım kimi tarixə düşüb.
Bu göstəricilər son iki ildə doğum səviyyəsində müşahidə olunan artım tendensiyasının davam etdiyini göstərir.
Digər tərəfdən, ölkədə ümumi artım əmsalı 2024-cü illə müqayisədə 0,05 artaraq 0,8-ə çatıb. Beləliklə, artım göstəricisi son 4 ilin ən yüksək səviyyəsinə yenidən yüksəlib.
Məlumatlar həmçinin göstərir ki, 2025-ci ildə ölüm sayı illik əsasda 1,3 faiz artaraq 363 min 400 nəfərə çatıb və bu da 110 min nəfərlik təbii əhali azalmasına səbəb olub.
Qeyd edək ki, Cənubi Koreya 2023-cü ildə 0,72 göstərici ilə dünyada ən aşağı doğum səviyyəsinə malik ölkələr arasında birinci yerdə qərarlaşmışdı.
