"Barselona"nın ulduzuna Səudiyyə Ərəbistanından təklif

İspaniyanın "Barselona" klubunun vingeri Rafinya Dias qarşıdan gələn yay transfer pəncərəsində olduqca cəlbedici təkliflər ala bilər.

"Operativ Məlumat Mərkəzi-OMM" xəbər verir ki, braziliyalı futbolçu Səudiyyə Ərəbistanı təmsilçilərinin marağına səbəb olub və onlar oyunçuya yüksək məvacibli müqavilə təklif etməyə hazırdırlar.

İspaniyanın "Mundo Deportivo" nəşrinin yaydığı məlumata görə, hazırda 29 yaşlı hücumçu tamamilə Kataloniya təmsilçisinə sadiqdir və heç yerə getmək fikrində deyil.

Öz növbəsində, klub rəhbərliyi də əsas oyunçularından birini satmaq niyyətində olmadığını açıqlayıb.

Məşhur "Transfermarkt" portalının qiymətləndirməsinə əsasən, Rafinya Diasın hazırkı bazar dəyəri 80 milyon avro təşkil edir.

Ulduz futbolçunun İspaniya nəhəngi ilə qüvvədə olan müqaviləsi isə 2028-ci ilin ortalarına qədər nəzərdə tutulub.