Banqladeşdə hökumət əleyhinə nümayişlər zamanı azı 300 nəfər ölüb.
"Operativ Məlumat Mərkəzi-OMM" xəbər verir ki, bu barədə Banqladeşin polis və xəstəxana rəhbərliyi məlumat yayıb.
Daha əvvəl 90-dan çox ölüm xəbəri verilmişdi.
Avqustun 4-də paytaxt Dəkkə və digər şəhərlərdə etirazçılarla hökumət tərəfdarları arasında toqquşmalar yenidən alovlanıb. Mitinq iştirakçıları baş nazir Şeyx Hasinanın istefasını tələb edirlər. Polisin rezin güllələr, gözyaşardıcı qaz və səsli qumbaralardan istifadə etdiyi bildirilsə də, media çoxlu sayda insanın güllə yaralarından öldüyünü yazıb.
İyulun əvvəlində etirazçılar Banqladeşin bir neçə şəhərində küçələrə çıxaraq 1971-ci il müstəqillik müharibəsi iştirakçılarının qohumları üçün iş kvotalarının ləğvini tələb ediblər. Respublikada vəziyyət tədricən gərginləşdi və etirazlar 250-dən çox insanın ölümü ilə nəticələnən iğtişaşlara çevrildi.
Səlahiyyətlilər məktəblərin, kolleclərin və universitetlərin bağlandığını elan etdilər. Paytaxtda komendant saatı elan edilib, rabitə əlaqəsi kəsilib, televiziya yayımları kəsilib. Banqladeş hüquq-mühafizə orqanları etirazlarla əlaqədar ölkə boyu 10 mindən çox insanı həbs edib.
