OMM Redaksiyası
Azərbaycan Beynəlxalq İnkişaf Agentliyi (AIDA) və Türkiyə Əməkdaşlıq və Koordinasiya Agentliyi (TİKA) beynəlxalq inkişaf və humanitar əməkdaşlığın gücləndirilməsi barədə razılaşma imzalayıb.
Memorandum Bakıda AIDA-nın yaradılmasının 15-ci ildönümünə həsr olunan “Humanitar yardım və inkişaf əməkdaşlığı vasitəsilə qlobal həmrəyliyin gücləndirilməsi” konfransı çərçivəsində imzalanıb. Sənədə Azərbaycanın xarici işlər nazirinin müavini Yalçın Rəfiyev və TİKA-nın rəhbəri Abdullah Eren imza atıblar.
Konfransda çıxış edən Abdullah Eren bildirib ki, AIDA son 15 ildə beynəlxalq inkişaf sahəsində mühüm tərəfdaş kimi özünü təsdiqləyib və tərəfdaşları arasında güclü nüfuz qazanıb.
Onun sözlərinə görə, AIDA beynəlxalq inkişaf agentlikləri arasında daha gənc qurumlardan biri olsa da, əldə etdiyi nəticələr artıq daha təcrübəli təşkilatların diqqətini cəlb edib. Eren AİDA-nın fəaliyyətini Azərbaycanın əsrlər boyu formalaşmış həmrəylik və xeyriyyəçilik ənənələrinin davamı kimi qiymətləndirib.
TİKA rəhbəri Azərbaycanın işğalın nəticələri, qaçqın və məcburi köçkün problemləri ilə üzləşən ölkədən etibarlı və hörmətli donor dövlətə çevrildiyini vurğulayıb. O qeyd edib ki, Azərbaycanın təcrübəsi inkişaf etməkdə olan ölkələr üçün xüsusi əhəmiyyət daşıyır.
Azərbaycan Xarici İşlər Nazirliyinin tabeliyində fəaliyyət göstərən AIDA 2011-ci ildə yaradılıb. Agentlik ötən 15 il ərzində 140-dan çox ölkəyə yardım göstərib və ikitərəfli, eləcə də çoxtərəfli kanallar vasitəsilə təxminən 400 milyon dollar vəsait ayırıb.
AIDA-nın fəaliyyət istiqamətlərinə səhiyyə, təhsil, təbii fəlakətlərə cavab tədbirləri və institusional potensialın gücləndirilməsi daxildir. Afrikanın 50-dən çox ölkəsi də agentliyin yardım proqramlarından yararlanıb.
İmzalanan memorandum Azərbaycan və Türkiyə arasında inkişaf əməkdaşlığında yeni mərhələnin başlanmasına imkan yaradacaq. Tərəflər bir sıra Afrika ölkələrində peşə təhsili və potensialın gücləndirilməsi proqramları daxil olmaqla, birgə təşəbbüslər həyata keçirməyi planlaşdırır.
Konfransda beynəlxalq əməkdaşlığın yalnız təcili humanitar yardımla məhdudlaşmaması, uzunmüddətli inkişafın və yerli potensialın dəstəklənməsinə yönəlməsi məsələləri də müzakirə olunub. İştirakçılar münaqişə, məcburi köçkünlük və humanitar böhranların milyonlarla insana təsir etdiyi bir vaxtda davamlı həllərin hazırlanmasının vacibliyini qeyd ediblər.
