Avstraliya və Hindistan enerji təhlükəsizliyi və ticarət əlaqələrinin genişləndirilməsi məqsədilə mühüm razılaşmaya imza atıb.
"Operativ Məlumat Mərkəzi-OMM" xəbər verir ki, sazişə əsasən, Avstraliya Hindistanın nüvə enerjisi sektorunun ehtiyaclarını təmin etmək üçün bu ölkəyə uran ixrac edəcək.
Məlumata görə, razılaşma təmiz enerji, kritik minerallar və infrastruktur sahələrində iki ölkə arasında əməkdaşlığın dərinləşdirilməsinə xidmət edir.
Bildirilib ki, Melburnda keçirilən danışıqlardan sonra Avstraliyanın Baş naziri Entoni Albaniz bu sazişin Hindistanın qalıq yanacaqlardan asılılığını azaltmaq və yaşıl enerjiyə keçidini dəstəkləmək baxımından strateji əhəmiyyət daşıdığını qeyd edib.
Qeyd olunub ki, Hindistan 2047-ci ilə qədər nüvə enerjisi gücünü 100 giqavata çatdırmağı planlaşdırır. Avstraliyanın zəngin uran ehtiyatlarına çıxışın bu məqsədə çatmaqda mühüm rol oynayacağı bildirilib.
Məlumata əsasən, iki ölkə arasında 2014-cü ildə nüvə əməkdaşlığı sazişi imzalansa da, uran ixracı təhlükəsizlik təminatları səbəbindən məhdudlaşdırılmışdı.
Bildirilib ki, Hindistanın Baş naziri Narendra Modi enerji keçidi, yaşıl hidrogen və aşağı karbonlu alüminium istehsalı sahələrində əməkdaşlığın yeni imkanlar yaratdığını vurğulayıb.
Qeyd edilib ki, Avstraliyanın ən böyük pensiya fondu olan "AustralianSuper" Hindistanın Milli İnvestisiya və İnfrastruktur Fonduna 500 milyon Avstraliya dolları məbləğində əlavə sərmayə yatıracağını açıqlayıb.
Xatırladaq ki, hazırda Hindistan Avstraliyanın beşinci ən böyük ticarət tərəfdaşıdır. Kanberra bu addımlarla ticarət əlaqələrini genişləndirməyi və Çindən asılılığı azaltmağı hədəfləyir.
