OMM Redaksiyası
Avropa Parlamenti çərşənbə günü İspaniyanın Şimali Afrikadakı Seuta anklavına iyulun sonunda baş verən kütləvi miqrant axınını pisləyən düzəlişi qəbul edib.
Düzəlişin lehinə 435 deputat səs verib, 209 deputat əleyhinə çıxıb, 13 deputat isə bitərəf qalıb.
Parlament hadisəni Avropa İttifaqının cənub sərhədinə yönəlmiş “hücum” və “işğal” kimi xarakterizə edib. Qurum insidentin planlaşdırılması və həyata keçirilməsinə, eləcə də məqsədinə dair məsuliyyəti müəyyənləşdirmək üçün “müstəqil və hərtərəfli” araşdırma aparılmasını tələb edib.
İyulun sonunda Seutanın yerləşdiyi Mərakeş ərazisindən çox sayda qeyri-qanuni miqrant anklava keçib. Bu hadisə İspaniyada son illərin ən ciddi sərhəd miqrasiya böhranına səbəb olub.
Seutanın yerli hökuməti fövqəladə vəziyyət elan edib və İspaniya mərkəzi hökumətindən hərbi dəstək göndərilməsini istəyib.
Seuta şəhərinin meri Xuan Xesus Vivas ötən cümə günü anklavda təxminən 13 min qeyri-qanuni miqrantın, o cümlədən müşayiətsiz yetkinlik yaşına çatmayanların qaldığını bildirib.
Vivas Mərakeşin sərhəd miqrasiya böhranından Seutanın ərazi bütövlüyünə təzyiq göstərmək üçün istifadə etdiyini də iddia edib və Avropa İttifaqından qətiyyətli cavab tələb edib.
